सरस्वती वन्दना

जय जय हे भगवति सुरभारति

जय जय हे भगवति सुरभारति
तव चरणौ प्रणमामः
जय जय हे भगवति सुरभारति
तव चरणौ प्रणमामः।।

नादब्रह्ममयि जय वागीश्वरि,
नादब्रह्ममयि जय वागीश्वरी,
शरणं ते गच्छामः।
जय जय हे भगवति सुरभारति….।

त्वमसि शरण्या त्रिभुवनधन्या
सुर-मुनि-वन्दित-चरणा
नव-रस-मधुरा कवितामुकुरा
स्मित-रुचि-रुचिराभरणा।
जय जय हे भगवति सुरभारति….।

आसीना भव मानसहंसे
कुन्द-तुहिन-शशि-धवले
हर जडतां कुरु बोधिविकासं
सित-पङ्कज-तनु-विमले।

ललितकलामयि ज्ञानविभामयि
वीणा-पुस्तक-धारिणी
वीणा-पुस्तक-धारिणी……।
मतिरास्तां नो तव पदकमले
अयि कुण्ठाविषहारिणि।

जय जय हे भगवति सुरभारति
तव चरणौ प्रणमामः
नादब्रह्ममयि जय वागीश्वरि,
नादब्रह्ममयि जय वागेश्वरी,
शरणं ते गच्छामः।

जय जय हे भगवति सुरभारति….।
जय जय हे भगवति सुरभारति….।
जय जय हे भगवति सुरभारति….।

सौजन्यं स्रोतश्च — श्रीमती अर्चना शैला श्रीमान् हेमदीप शैलश्च,गेयसंस्कृतम् — संस्कृतभारती — बैगलूरु